II. Hluti - Vinnuhópur 3, Milliríkjanefnd Sameinuðu þjóðanna um loftslagmál (IPCC)

Ég hef áður gert færslu um vinnuhóp 3, hjá IPCC. Hér kemur annar hluti færslunar um vinnuhóp 3, hjá Milliríkjanefnd Sameinuðu þjóðanna um loftslagsmál (IPCC). Í fyrri færslunni var farið yfir fyrstu 3 atriðin hérundir:

1.      Losun

2.      Tæknileg lykil atriði varðandi mótvægisaðgerðir (Key mitigation technologies) fyrir árið 2030

3.      Samtenging kostnaðar og möguleika og landsframleiðslu 2030

4.      Stefnumál/reglur varðandi loftslagsmál (Climate policies)

5.      Langtíma mótvægisaðgerðir

6.      Mikilvægi UNFCCC og frekari vinna IPCC

 Í þessari færslu mun ég gera lauslega grein fyrir síðustu þremur atriðunum. Þessi færsla er skrifuð af leikmanni og áhugamanni um loftslagsvísindi.

4. Stefnumál/reglur varðandi loftslagsmál (Climate policies)

Fjárfestingar geta verið til lengri eða skemmri tíma. Þar af leiðandi þarf strax að byrja á því að huga að því hvernig að þeim er staðið.

·         Fjárfestingar í orkugeiranum (20 biljón US$ þangað til 2030) þurfa að taka mið af því að minnka losun gróðurhúsalofttegunda, þar sem þessar fjárfestingar hafa langtímaáhrif á losun gróðurhúsalofttegunda.

·         Víðtæk dreifing lág-kolefna tækni getur tekið marga áratugi, jafnvel þó að fjárfestingar í þessari tækni verði gerðar fjárhagslega aðlaðandi í dag.

·         Það að snúa losun koltvísýrings og öðrum gróðurhúsalofttegundum í sömu stöðu árið 2030 og var árið 2005 þarfnast stefnubreytingar varðandi fjárfestingar til framtíðar.

·         Það er oft áhrifaríkara kostnaðarlega séð að fjárfesta í lausnum fyrir notendur orkunnar, sem stuðla að skilvirkari orkunotkun, heldur en að auka framboð orku.

Stefnumál til breytingar í loftslagsmálum

Skilvirkni reglna og stefnu í loftslagsmálum fer eftir aðstæðum í hverju landi, gerð þeirra, gagnkvæm áhrif, hversu ströng þau eru og framkvæmdin sjálf.

Helstu áherslumál geta verið

·         Reglur og staðlar

·         Skattar og gjöld

·         Verslun með losunarkvóta

·         Fjárhagsleg hvatning

·         Sjálfviljugt samkomulag aðila

·         Tæki til að koma upplýsingum til skila

·         Rannsóknir og þróun

Skilvirkt verð vegna kolefnislosunar getur orðið til þess að varnaraðgerðirnar verði mögulegar í öllum geirum (sjá mynd 4 um skiptingu losunar eftir geirum).

 

 

·         Verð fyrir kolefnislosunarheimildir (eins og í ESB kerfinu) getur skapað hvatningu til fjárfestingar í tækni sem minnkar kolefnislosun, s.s. vörur, tækni og ferlar þar sem framleiðsla inniheldur minni koltvíoxíð en áður.

·         Til að ná jafnvægi kolefnis í andrúmsloftinu í u.þ.b. 550 ppm CO2eq, þá þyrfti verðið vegna kolefnislosunar að vera u.þ.b. 20-80 US$/tCO2eq árið 2030.

5. Langtíma mótvægisaðgerðir

Hvað er jafnvægi:

·          Markmið UNFCCC = að ná jafnvægi í styrk GHL í andrúmsloftinu

·         Þetta þarf að vera í jafnvægi sem kemur í veg fyrir að „fram komi hættulegar manngerðar loftslags breytingar“

·         ESB markmið 2° C = nokkurn vegin 450 ppm

·         Til að ná þessu jafnvægi þarf losun GHL að minnka miðað við losunina í dag

Lykilspurningin er því; er hægt að koma í veg fyrir að „fram komi hættulegar manngerðar loftslags breytingar“. (sjá mynd 5 - hlutfall CO2 í lofthjúpnum samanborið við hitastigshækkun)

 

 

Þeim mun lægri styrk CO2 í andrúmsloftinu sem markmiðið er sett á (sjá mynd 5), þeim mun fyrr þarf  að byrja að draga úr losun.

Leiðir að jafnvægi (mynd 6)

 

 

6. Mikilvægi UNFCCC og frekari vinna IPCC

Í þessum kafla er talað um mikilvægi UNFCCC (United Nations Framework Convention on Climate Change) og frekari vinnu IPCC. Ég ætla ekki að koma mikið inná það hér.

Helstu atriði eru að lönd í svokölluðum Annex 1 hóp (þau lönd sem menga mest í dag) þurfa að draga meira úr losun en þau sem eru í non-Annex 1 hóp (lönd sem menga minna í dag). Til að ná því markmiði að hitastig hækki ekki um meira en 2 gráður celsíus (450 ppm (mynd 5)), þá þarf losun gróðurhúsalofttegunda að toppa á næstu 10-15 árum og minnka niður fyrir helming af 2000 losuninni fyrir miðja öldina. Löndin í Annex 1 hópnum þyrftu því að ná að minnka losunina 2020 niður í um 25-40% undir 1990 losuninni.

Lokaorð

Helsta niðurstöður VH 3 hjá IPCC er eins og ég best fæ séð:

• Hægt er að ná áþreifanlegum árangri til  minnkunar losunar koltvíoxíðs og kostnaður við mótvægisaðgerðir virðist vera viðráðanlegur.
• Aðgerðir þurfa að hefjast sem fyrst til að hægt sé að ná árangri til minnkunar á losun gróðurhúsalofttegunda og þar með koma í veg fyrir að hitastig stígi um of.
• Mótvægisaðgerðir snúast því fyrst og fremst um minnkun losunar gróðurhúsalofttegunda, þá aðalega koltvíoxíðs.
  
• Eins og fyrr sagði, þá hefur maðurinn valdið hættulegum loftslagbreytingum – maðurinn getur lagað það.

 Helstu heimildir:

http://www.ipcc.ch/pdf/presentations/pre-cop-warsaw-2-10-2008/pres-warsaw-mitigation-climate-change-meyer.pdf

http://www.ipcc.ch/pdf/assessment-report/ar4/wg3/ar4-wg3-spm.pdf

---

Breytingar 13. júní, orðinu varnaraðgerðir skipt út fyrir orðið mótvægisaðgerðir.

Frakkar ákveða kolefnaskatt